Mambo 6 yasiyo ya kweli kuhusu kuchaji simu

Kuna mengi sana unaweza ukawa ushasikia sana kuhusu njia nzuri za kuchaji simu yako. Pia utakuwa umeshasikia kuhusu ambayo hutakiwi kufanya ukiwa unachaji simu. Je yana ukweli wowote?  Leo tutakuelezea kwa uchache na kwa ukweli mambo muhimu kuhusu kuchaji kwa simu na usalama wa betri za simu wakati tukiwa tunazichaji

1. Kutumia chaja ambazo si za makampuni ya simu zinaua simu?  Hapana, hakuna ukweli kabisa katika hili ila ukweli ni kwamba usitumie chaja za ubora mbovu. Chaja feki si chaja zote ambazo hazitengenezwi na kampuni husika ya simu bali ni chaja ambazo zipo chini ya kiwango. Na hizi utazigundua kupitia bei zake, usikubali kumiliki simu ya gharama halafu ukawa mbahili katika kununua chaja za uhakika kisa bei zake.  Cha kufanya soma kuhusu kiwango na ubora wa chaja inayofaa kwenye simu yako kabla ya kununua chaja isiyokuja na simu yako.

2. Usitumie simu yako wakati unaichaji?  Si kweli, ni kweli zamani sana, kwa sasa teknolojia inayotumika kwenye chaja na simu ni salama kabisa.  Cha kuhakikisha ni kwamba unatumia chaja zilizo na kiwango/ubora wa uhakika (original/quality). Kumbuka hapa haimaanishi ni kwamba lazima iwe ni yenye lebo/nembo ya kampuni husika bali hili ni suala la kuwa ni chaja yenye ubora wa uhakika.

3. Usizime simu yako kamwe!?  Si kweli! Unashauliwa kuzima simu yake angalau ata mara moja kwa wiki kwa angalau lisaa. Simu kama vifaa vingine vyote vya umeme ni muhimu kupata muda wa kupumzishwa. Na jambo hili ndio linaboresha zaidi uhai wa simu yako.

4. Kuchaji simu usiku kucha kutaiua/haribu?  Usisikilize hii…si kweli! labda kama unatumia simu iliyotengenezwa miaka ya 1980 :-). Teknolojia imekua sana, fahamu ya kwamba simu zote za siku hizi zitaacha kutumia umeme pale simu yako itakapochaji hadi asilimia 100! Itaacha kuchaji! Hakuna madhara! Ila hii haimaanisha ndio uiache kwa zaidi ya masaa 15! na pia kuhakikisha unaichaji sehemu inayopata hewa

5. Subiri hadi chaji iwe chini kabisa au imeisha ndio uchaji?  Hili sio kweli! Ukweli ni kwamba kuchaji mara kwa mara ndio kunasaidia zaidi kuongeza maisha ya betri yako. Kumbuka kuchaji mara kwa mara si kila baada ya dakika 5, bali ni kwamba usisubiri chaji iwe chini ndio uchaji, na si lazima ukiweka kwenye chaji usiitoe hadi imejaa.

6. Kuna aina kuu mbili za mabetri yanatumika kwa sasa  Kuna mabetri yanayotumia teknolojia ya Lithium-Ion (Li-ion) na Lithium-Ion-Polymer (Li-ion polymer/Lithium Polymer). Kuna teknolojia nyingi zilizokuwepo zamani ila kwa sasa hizi ndio zinazotumika zaidi. Na zinatumika kutokana na ubora wake. Lithium-Ion (Li-ion) zinatumika zaidi katika simu nyingi zaidi wakati mabetri ya Lithium-Ion-Polymer yanatumika zaidi katika laptop na baadhi ya simu pia.

Lithium-Ion-Polymer ndio teknolojia bora zaidi na salama zaid, lithium-Ion ni salama pia kwa kiwango kikubwa sana ila lithium-ion-polymer ni zenye ubora zaidi na hii inaweza kuwa ni sababu kubwa zinatumika kwenye laptop nyingi tayari. Teknolojia hizi zimefanya ulipukaji ovyo wa mabetri ya simu kuwa mgumu sana kuliko unavyofikiri.

Leo katika historia Alhamisi tarehe 25/08/2016

Miaka 149 iliyopita katika siku kama hii ya leo alifariki dunia msomi mashuhuri wa Uingereza Michael Faraday.  Faraday alizaliwa mwaka 1791 mjini London na licha ya kuwa hakuwa na elimu ya juu lakini alifanikiwa kupata maendeleo muhimu katika fizikia na kemia kwa kutumia majaribio na tajiriba.  Tarehe 24 Novemba miaka 184 iliyopita, Michael Faraday aligundua chombo cha mkondo wa umeme kinachojulikana kwa kitaamu kama ''Electric Current''. Kwa ugunduzi huo Faraday akawa amefanikiwa kupiga hatua kubwa katika elimu ya fizikia. Miongoni mwa mafanikio mengine makubwa yaliyoletwa na mtaalamu huyo ni ugunduzi wa mota ya umeme pamoja na kubadilisha nguvu za sumaku kuwa nguvu za umeme.

Katika siku kama ya leo miaka 921 iliyopita sawa tarehe 25 Agosti mwaka 1095, vilianza Vita vya Msalaba kati ya Wakristo na Waislamu.Katika vita hivyo wafuasi wa kanisa walichora alama za msalaba kwenye mabega na mavazi yao, na kwa sababu hiyo vita hivyo vimekuwa maarufu kwa jina la Vita vya Msalaba. Baada ya vita vingi na Waislamu, wapiganaji wa msalaba hatimaye waliuteka na kuukalia kwa mabavu mji wa Baitul Muqaddas huko Palestina mnamo mwaka 1099.Mji huo ulikombolewa mwaka 1187 na wapiganaji wa Kiislamu waliokuwa wakiongozwa na Salahuddin Ayyubi

Na siku kama ya leo miaka 28 iliyopita Baraza la Usalama la Umoja wa Mataifa lilitoa azimio nambari 620 likilaani hatua ya Iraq ya kutumia silaha za kemikali.

Bado wiki tatu mbowe kutimuliwa billicanas

Zimebaki wiki tatu kabla Shirika la Nyumba la Taifa (NHC) kuchukua jengo la Bilicanas lililokodiwa na Mwenyekiti wa Chama cha Demokrasia na Maendeleo (Chadema), Freeman Mbowe, kuendesha biashara ya ukumbi wa starehe.

Jengo hilo lipo eneo la Posta jijini Dar es Salaam.Awali, NHC ilikuwa imetoa notisi ya siku 60 kwa wadaiwa sugu ambao wamepanga katika majengo yake akiwamo Mbowe.

 

Akizungumza na waandishi wa habari jana, Mkurugenzi Mkuu wa NHC, Nehemia Mchechu, alisema pamoja na Bilicanas, shirika linazidai taasisi za umma, binafsi na watu binafsi jumla ya Sh. bilioni 15.

 

Notisi ya siku 60 ya kuondoka Bilicanas pamoja na majengo ya wadaiwa wengine ilishatolewa, Mchechu alisema na kwamba sasa zimesalia wiki tatu.

 

Alisema baada ya muda huo kumalizika, utekelezaji wa kuondolewa katika majengo hayo utaanza ukiambatana na uchukuaji wa hatua za kisheria.

 

Mchechu alisema mbali ya Bilicanas, wadaiwa wengine ni Wizara ya Mawasiliano na Uchukuzi inayodaiwa Sh. bilioni mbili, Benki ya Azania (Sh. milioni 161) na Wizara ya Mambo ya Nje, Ushirikiano wa Afrika Mashariki, Kikanda na Kimataifa (Sh. milioni 631).

 

Wadaiwa wengine walitajwa kuwa ni Wizara ya Afya na Maendeleo ya Jamii, Jinsia, Wazee na Watoto (Sh. bilioni 1.3), Wizara ya Ujenzi, Uchukuzi na Mawasiliano (Sh. bilioni mbili), Tume ya Utumishi (Sh. milioni 109) na Wizara ya Habari, Utamaduni, Sanaa na Michezo Sh. bilioni moja.

 

Mchechu alisema ukusanyaji wa madeni hayo kwa nguvu ni mkakati wa shirika hilo kukusanya fedha ili kusaidia ujenzi wa nyumba za watumishi wanaohamia Dodoma.

 

Alipoulizwa iwapo mkakati huo una uhusiano wowote na masuala ya kisiasa kutokana na kumtaja Mbowe kuwa ni kati ya wadaiwa sugu, Mchechu alisisitiza hakuna uhusiano wa siasa na zoezi hilo kwani wateja wote wanachukuliwa sawa.

 

“Mwaka huu ujenzi unaanza Dodoma," alisema Mchechu, hivyo fedha tunazodai zitatusaidia kukamilisha uwekezaji mjini humo."

 

“Ndiyo maana tumetoa kwa tunaowadai notisi ya miezi miwili, vinginevyo wataondolewa katika majengo ya shirika kama kanuni zinavyotaka.

 

“Hakuna uhusiano wowote kati ya shirika kukusanya fedha linazodai na watu binafsi akiwamo Mbowe, taasisi za umma na binafsi.

 

“Lengo ni kukusanya madeni ambayo baadhi yake yalisimama kutokana na mengine kuwa na kesi mahakamani.”

 

Alisema kuwa fedha hizo zitatumika kwa ujenzi wa nyumba za watumishi 300 hadi 500 mkoani Dodoma.

 

Alisema ujenzi huo unatarajia kuanza mara moja na utachukua miezi 12.

 

Kwa mujibu wa Mchechu, Sh. bilioni 60 za ujenzi wa nyumba hizo zitatokana na fedha za ndani.

 

Alisema shirika hilo limenunua ekari 240 eneo la Iyumbu, ekari saba Chamwino, nne Bahi na Chemba ekari nne pia ikiwa ni kuunga mkono azma ya Serikali ya Awamu ya Tano kuhamia Dodoma.

 

Alisema fedha nyingine zitapatikana baada ya nyumba 97 za shirika hilo zilizopo Medeli mjini Dodoma kuuzwa.

 

Aidha, Mchechu alisema kitendo cha Serikali kuhamia Dodoma kitatoa fursa kwa Jiji la Dar es Salaam kujiimarisha kibiashara tofauti na ilivyo sasa ambapo linakwamishwa na foleni kubwa za magari kutokana na shughuli nyingi za serikali kufanyika.

 

“Dar es Salaam kuna bandari, uwanja wa ndege," alisema na kuongeza: “Hivyo suala la kiuchumi litaimarika zaidi kutokana na shughuli nyingi za Serikali kuhamia Dodoma. Hii itasaidia uchumi wa nchi kusambaa katika maeneo tofauti nchini.”

 

Uwekezaji wa NHC jijini Dar es Salaam upo kwa asilimia 70, alisema na kwamba ufanisi wa Jiji utaongezeka hususani katika usafiri na sekta nyingine kiuchumi.

Lowassa: Jeshi la Polisi linatumika vibaya

Edward Lowassa,

Na DITRO YOSIA,KIGOMA
WAZIRI Mkuu wa zamani aliyegombea urais kupitia Chadema na kuungwa mkono na mwamvuli wa vyama vinavyounda Umoja wa Katiba ya Wananchi (Ukawa), katika Uchaguzi Mkuu mwaka jana, Edward Lowassa, amesema Jeshi la Polisi linatumika vibaya.
Kauli hiyo aliitoa jana wilayani Mbarali mkoani Mbeya, alipokuwa akihutubia wananchi nje ya Ukumbi wa Lutheran uliokuwa ufanyike mkutano wake wa ndani baada ya polisi kuufunga.
Lowassa ambaye pia ni Mjumbe wa Kamati Kuu ya Chadema, aliwataka wananchi kuwa watulivu na wasifanye fujo baada ya zuio hilo la polisi.
“Wananchi endeleeni kuwa watulivu, polisi wamezuia mkutano halali, msifanye fujo yoyote na pokeeni maelekezo kwa viongozi kwani nitarudi tena siku nyingine, pole sana kwa adha mliyoipata.
“Niseme Jeshi la Polisi linatumika vibaya, Chama Cha Mapinduzi (CCM) kimeamua kuivunja demokrasia ya vyama vingi na sheria na 5 ya mwaka 1992 ya uanzishwaji wa vyama vingi,” alisema Lowassa.
HALI ILIVYOKUWA
Mkutano huo ulizuiwa na polisi ambao walifunga ukumbi kwa ufunguo jana saa 5:40 asubuhi na kuwazuia kuingia ndani mamia ya wananchi na wanachama wa Chadema Wilaya ya Mbarali waliofika kumsikiliza Lowassa.
Alipowasili katika eneo la tukio, Lowassa alijikuta akikwama kufanya mkutano uliokuwa umepangwa kufanyika hapo baada ya kukuta askari polisi wakiongozwa na Mkuu wa Polisi wa Wilaya ya Mbarali (OCD), L. Muhaji ambaye aliufunga ukumbi huo kwa kufuli.
Hatua hiyo ilimfanya Lowassa kubaki ndani ya gari lake, huku viongozi wa Chadema wa Kanda ya Nyanda za Juu Kusini (Nyasa), Frank Mwaisumbe pamoja na Mjumbe wa Kamati Kuu, Hashim Issa wakimfuata OCD juu ya hatua yake ya kufunga ukumbi huo.
Katika majadiliano hayo, OCD Muhaji aliwajibu viongozi hao kwamba amepokea maagizo kutoka ngazi za juu ya kuzuia mkutano huo kwa sababu walishapewa maelekezo katika vikao vyao, na hakuna haja kwa viongozi wa kitaifa kufanya mikutano wilayani humo.
Baada ya kusubiri kwa zaidi ya dakika 10, Lowassa alilazimika kushuka ndani ya gari na kwenda walipo viongozi hao na OCD.
Alipomuuliza OCD huyo kuhusu hatua yake ya kufunga ukumbi huo, majibu yake yalikuwa kama aliyowapa viongozi wa kanda.
“Ndugu yangu (OCD) inakuwaje hali hii? IGP (Mkuu wa Jeshi la Polisi, Ernest Mangu) alisema haitakiwi polisi kuingilia shughuli za mikutano ya ndani, sasa wapigie wakubwa wako wakupe ‘confirmation’ (wakuthibitishie) ili uachie funguo za ukumbi,” alisema Lowassa wakati akizungumza na OCD.
Pamoja na hali hiyo, OCD huyo alipopiga simu kwa viongozi wake wa juu, haikupokewa hali iliyomlazimu Lowassa kumpigia simu Mkuu wa Mkoa wa Mbeya, Amos Makalla kama Mwenyekiti wa Kamati ya Ulinzi na Usalama ili kupata maelezo ya suala hilo, lakini pia haikupokewa.
MTANZANIA lilipomtafuta Makalla kwa njia ya simu ili kupata ufafanuzi wa suala hilo, simu yake haikupokewa na alipotumiwa ujumbe mfupi wa simu pia haukujibiwa.
AZUIWA KWENDA RUKWA
Awali jana asubuhi, Lowassa alijikuta akikwama kwenda katika mikoa ya Rukwa na Katavi baada ya polisi kuuzuia msafara wake kwa hofu kwamba unaweza kuingilia ziara ya Waziri Mkuu Kassim Majaliwa anayetembelea mikoa hiyo.
Lowassa alianzia ziara yake mkoani Mbeya tangu Agosti 21. Juzi alifanya vikao vya ndani katika majimbo yanayoshikiliwa na wabunge wa chama chake mkoani Songwe, na jana asubuhi alitarajiwa kwenda Katavi na Rukwa.
Katika Mikoa ya Rukwa na Katavi, alitarajiwa kufanya mikutano ya ndani majimbo ya Nkasi Kaskazini, Kusini na Sumbawanga.
Katibu wa Chadema Kanda ya Nyanda za Juu Kusini (Kanda ya Nyasa), Frank Mwaisumbe, alisema kwamba polisi walimpigia simu Lowassa juzi saa 1.00 jioni akiwa Tunduma, wakimtaka aahirishe ziara yake Mkoa wa Rukwa.
Kamanda wa Polisi Mkoa wa Rukwa, Gorge Kyando, alipoulizwa kwa njia ya simu, alisema waliwashauri viongozi wa Chadema wapange siku nyingine ya ziara kwa sababu mkoa ulikuwa na ugeni mkubwa.

Watu watano wafariki dunia kwa ajali

Kamanda wa Polisi Mkoa wa Kilimanjaro, Wilbrod Mutafungwa.

Na Ditro yosia,Kigoma.
WATU watano wamefariki dunia papohapo na wengine wanne kujeruhiwa  vibaya baada ya gari walilokuwa wakisafiria kugongana uso kwa uso na gari la mizigo wilayani Same mkoani Kilimanjaro.
Kamanda wa Polisi Mkoa wa Kilimanjaro, Wilbrod Mutafungwa, alisema ajali hiyo ilitokea jana saa 10: 45 alfajiri  katika eneo la Alikacheje Sekondari, Kijiji cha Makanya wilayani Same.
Alisema gari  ya Toyota Noah nambari   T933 DFY   iliyokuwa  imebeba magazeti ya MTANZANIA yanayochapishwa na Kampuni ya New Habari (2006) Limited, ilikuwa  ikitokea  Dar es Salaam kwenda  mkoani Arusha  liligongana uso kwa uso na gari ya mizigo  nambari T.532 DFQ Scania semi trailer  na kusababisha vifo hivyo   na majeruhi hao.
“Gari hilo la mizigo lililokuwa likitoka Babati kwenda mkoani Tanga na kuendeshwa na  dereva aliyefahamika kwa jina la Riziki Mandoo mkazi wa Karatu mkoani Arusha, liligongana na gari hiyo   ya Noah na kusababisha vifo vya watu watano papohapo ambao  wote walikuwa ni wanaume  akiwamo dereva wa Noah aliyefahamika,   Kiwanga Dominick (37) mkazi wa Kahe wilayani Moshi pamoja na majeruhi wane,” alisema.
Alisema   miili miwili ya marehemu ndiyo iliyotambulika ikiwamo ya dereva wa gari hilo pamoja na mtu mmoja,    Inocent Massawe (25), mkulima na mkazi wa Kibosho huku marehemu wengine watatu wakiwa bado hawajaweza kutambulika.
Aliwataja waliojeruhiwa katika ajali hiyo kuwa ni Juma Kobasi (36) Simon Kaaya, Lita Ulutu (46) na Bakari Mndeme (31) na  majeruhi watatu kati yao wamepelekwa kupatiwa matibabu katika Hospitali ya Rufaa  KCMC.

Mwanamitindo amkabidhi Waziri Nape tuzo ya Canada

Herieth Paul

NA DITTO LYTO,
MWANAMITINDO wa   Kimataifa, Mtanzania Herieth Paul, amemkabidhi Waziri wa Habari, Utamaduni, Sanaa na Michezo, Nape Nnauye, tuzo ya mwanamitindo bora wa mwaka (Model of the Year 2016) aliyotunukiwa na Canadian Annual Art & Fashion Awards (CAFA).
Tuzo hiyo ya mwanamitindo bora wa mwaka ya Canada huwa na ushindani mkubwa kwani hutolewa kwa mwanamitindo aliyeonyesha kiwango cha juu na aliyetoa mchango mkubwa katika tasnia hiyo nchini Canada, ambapo shindano hilo lilifanyika Aprili 14 mwaka huu.
Herieth ambaye kwa sasa anasomea biashara kwa mwaka wa pili kwa njia ya mtandao nchini Canada, aliishukuru Serikali kwa kupokea tuzo hiyo ya kwanza kwake na kwa taifa.
Akizungumza na MTANZANIA jana, Waziri Nape alimpongeza mwanamitindo huyo kwa kuipeperusha vema bendera ya Tanzania na kuahidi kumsaidia anapohitaji msaada kutoka kwa Serikali.
“Serikali tunajitahidi kumsaidia kadiri ya uwezo wetu pale anapohitaji msaada, pia kama kuna vijana walikuwepo ndani na nje ya nchi wenye kipaji na kupeperusha vema bendera ya nchini, wajitokeze kwani hii ni kupanua wigo wa uchumi wa taifa pamoja na kujitangaza,” alisema Nnape.
Herieth aliipongeza Serikali kwa kukubali wito wake wa kumkabidhi tuzo hiyo aliyoipata nchini Canada kwa kuwa mwanamitindo wa kwanza, huku akiwatupa chini wanamitindo wanne kutoka katika nchi hiyo.
“Siwezi kuahidi kitu kwa Serikali kwani hii ni tuzo yangu ya kwanza, kikubwa ni kuhakikisha naendelea kuitangaza Tanzania kupitia kipaji changu hicho cha mitindo,” alisema.

Wanafunzi kuingia na bunduki darasani Texas, Marekani

 
Wanafunzi wa vyuo katika jimbo la Texas, Marekani wameruhusiwa kuingia na bunduki darasani.

Hii ni baada ya maprofesa wawili kushindwa kwenye ombi lao la kutaka mahakama izuiwe kutekelezwa kwa sheria mpya inayowaruhusu wanafunzi kubeba bunduki bila kuzionyesha hadharani.

Jaji katika mji wa Austin alipuuzilia mbali madai ya wahadhiri hao kwamba kuwepo kwa bunduki huenda kukawa hatari kubwa iwapo mjadala mkali utazuka darasani.

Mwanasheria mkuu wa Texas, Ken Paxton, ambaye ni wa chama cha Republican, aliunga mkono uamuzi wa jaji.

Alisema raia wanaotii sheria wana haki ya kujilinda hata wakiwa kwenye vyuo vikuu.

Chama cha Republican kinaamini kutekelezwa kwa sheria hiyo kunaweza kuzuia visa vya watu kuuawa kwa wingi na watu wenye bunduki kwa sababu wanaweza wakajilinda.

Jimbo la Texas lilipitisha sheria ya kuwaruhusu raia kubeba bunduki bila kuzionyesha hadharani miaka 20 iliyopita ingawa watu hawakuruhusiwa kuingia nazo vyuoni.

Hilo lilibadilishwa wiki tatu zilizopita kupitia marekebisho ya sheria.

Download video mp4 of AY

Cheka na masanja mkandamizaji

Ni kipindi cha harusi yake mnamo tarehe 14/08/2016.

Laugh 4 life

Vichekesho time

THAT IS WHAT IS IN MY MIND

I say thanks to my lord because of making me alive,without any payment to him

                                           IN GOD WE TRUST

Makundi yayumbisha CCM

KADA wa Chama Cha Mapinduzi (CCM) jijini Arusha, Medest Meikoki amesema kuyumba kwa chama hicho katika Jiji la Arusha na kusababisha upinzani kuongoza kutokana na makundi yaliyopo ndani ya chama hicho.

Akizungumza mjini hapa jana, Meikoki alisema aliamua kustaafu siasa baada ya kusulubiwa na makundi hayo ambayo kwa kiasi kikubwa yalikuwa na nguvu katika miaka ya 2000.

Alisema katika jiji hili kulikuwa na makundi mawili ya G7 na G13 ambayo yalikuwa na nguvu katika miaka hiyo.

Kada huyo, alisema bado baadhi ya wana CCM waliojeruhiwa na makundi hayo wana hasira dhidi ya chama chao na kuamua kukaa pembeni na kuacha wenye pesa wafanye watakavyo, lakini waliapa chama hakitachukua jimbo hilo kamwe.

Alisema hatua za ziada zinatakiwa kuchukuliwa na viongozi wa juu wa CCM wa kuwarudisha kundini waliojeruhiwa na makundi hayo bila ya sababu za msingi vinginevyo, upinzani utaendelea kuongoza.

Kada huyo aliendelea kusema kuwa makundi ya kisiasa ya G7 na G13 ndiyo yamekivuruga chama na kuifikisha siasa ya Arusha kuwa taabani kwani waliokuwa wakichaguliwa walikuwa ni viongozi wasiokuwa na sifa za kuongoza chama hicho.

Alisema, kundi la G7 lilikuwa kundi lenye uwezo mkubwa wa kifedha ambapo wafanyabiashara wakubwa wa Arusha, walikuwa katika kundi hilo na walikuwa wakiamua wanavyotaka na ukipingana nao unang’olewa.

Kada huyo alisema, kundi la G13 lilikuwa kundi la wanasiasa wenye kujua siasa za Arusha na nchi kwa ujumla na walikuwa wapambanaji lakini walikuwa ni watu wa kawaida tu wasiokuwa na fedha, lakini wenye mikakati ya kutaka chama kishike hatamu.

Alisema yeye aliwahi kushughulikiwa mwaka 2000 ndani ya chama na kundi la G7 kwani katika kura za maoni za ndani ya chama, alishinda lakini kundi hilo halikuridhika na likaamua kumtoa mwanaCCM na kumsimamisha upande wa Chama cha Tanzania Labour (TLP) ili kupambana naye kwenye udiwani wa kata ya Darajambili.

Kada huyo alisema kundi hilo lilifanikiwa, kwani TLP ilishinda katika kiti cha udiwani katika kata hiyo na yeye kuanguka vibaya ingawa awali alishinda kwa kishindo katika kura za maoni ndani ya chama

Alisema baada ya kushughulikiwa mwaka 2000 aliamua kujikita katika kushauri badala ya kugombea na alipoamua kuingia tena kwenye siasa mwaka 2005, alishughulikiwa tena na akaamua kustaafu na kubakia kuwa mshauri hadi sasa.

Utafiti:Madaktari Kusini mwa Sahara huzidisha dawa kwa wagonjwa

Utafiti unaonyesha kuwa madaktari wa nchi za kusini mwa Afrika wanatoa dawa nyingi zaidi ya zilizoagizwa na Shirika la Afya Duniani WHO.

Utafiti huo uliofanywa na Chuo kikuu cha London kwa ushirikiano na kituo cha Kutoa ushauri wa afya cha nchini Ghana,ikihusisha nchi kumi na moja za kusini mwa jangwa la Sahara zinaonyesha kuwa wagonjwa wanapewa takribani dawa tatu kila wanapotembelea hospitali, moja zaidi ya maelekezo ya WHO.

Inasemekana tatizo ni baya zaidi kwenye taasisi zinazotengeneza faida, na kuchochea kuuza dawa.

Tafiti zimeonya kuwa matumizi makubwa ya madawa yanasababishwa na kulazimishwa kutumia dawa, kuzidisha dozi na kuleta athari mbaya kwa mchanganyiko unaosababishwa na kuchanganya dawa mbalimbali.

Pia wamegundua wagonjwa wengi wamekuwa wakipewa dawa za kutuliza maumivu pasipo kufanyiwa vipimo, na kuongeza hatari ya maambukizo yanayosababisha na kupambana na dawa.

Leo katika historia jumatatu ya tarehe 22/08/2016

Siku kama ya leo miaka 156 iliyopita, Paul Gottlieb Nipkow mmoja wa wavumbuzi wa televisheni alizaliwa huko Ujerumani. Nipkow alikulia katika familia maskini, lakini juhudi yake thabiti aliyokuwa nayo ilimuwezesha kuendelea na masomo yake ya fizikia hadi akafika Chuo Kikuu. Paul Gottlieb Nipkow alifanya utafiti mkubwa na hatimaye alifanikiwa kuvumbua transimita ya televisheni. Chombo hicho kilichobuniwa na Nipkow kilikuwa na uwezo wa kurusha mawimbi ya televisheni hadi umbali wa mita 30 tu na baadaye transimita iliyotengenezwa na mvumbuzi huyo wa Kijerumani ilikamilishwa na wabunifu wengine

Miaka 339 iliyopita katika siku kama ya leo, vilijiri vita vya mwisho vya La Rochelle kati ya Wakatoliki na Waprotestanti wa Ufaransa. Vita hivyo vilianza baada ya Waprotestanti kuchochewa na Uingereza. Wakatoliki ambao walikuwa wakiungwa mkono na vikosi vya jeshi la serikali ya Ufaransa chini ya uongozi wa Richelieu, Kansela mashuhuri wa nchi hiyo, walipigana vita na Waprotestanti ambao walikuwa wakipigania maeneo yao katika bandari ya La Rochelle. Vita hivyo vilimalizika baada ya mwaka mmoja kwa kupata ushindi Wakatoliki na kukaliwa kwa mabavu La Rochelle.

Katika siku kama ya leo miaka 318 iliyopita, mkataba wa pande tatu wa Russia, Poland na Denmark ulitiwa saini dhidi ya Sweden. Wafalme wa nchi hizo tatu walikuwa na lengo la kumuangusha Sharel XII mfalme kijana wa Sweden ili kuikalia kwa mabavu nchi hiyo. Ni kwa msingi huo ndipo miaka miwili baadaye mnamo mwezi Aprili mwaka 1700 nchi wanachama wa mkataba huo wa pande tatu zikaamua kuishambulia Sweden, hata hivyo jeshi la mfalme Sharel XII likakabiliana vilivyo na kutoa pigo kwa nchi vamizi.  Baada ya kufikia mapatano na Denmark, mwaka 1704 akaishambulia Poland na kuikalia kwa mabau. Hata hivyo mashambulio ya Sharel dhidi ya Russia hayakuzaa matunda.

Jinsi ya kutafuta simu yako iliyopotea na kujua mahali ilipo

Upotevu wa simu yako ni moja ya jambo baya watu wanalipata.Unaweza kuibiwa simu yako iliyokuwa imehifadhi data nyingi binafsi.

Kwa msaada jinsi ya kupata simu yako iliyopotea, Google na Apple kwa pamoja wana njia za kufuatilia hili kutafuta mfumo wa simu yako.

Jinsi ya kutafuta iPhone iliyopotea
Ufumbuzi wake upo kwenye Find My iPhone.Huduma hii ina uwezo wa kukuonyesha kifaa chako chochote cha iOS

Kupata uwezo juu ya iPhone yako,fuata hatua hizi;
1.Nenda kwenye setting/mpangilio wa iPhone yako
2.Shuka chini utakuta iCloud
3.Katika chini ya orodha bonyeza "Find My iPhone"
4.Kwenye Find My Phone switch on position
5.Ukiwa hapo ni wazo zuri ku-turn on send last  location
Baada ya kuwezesha Find My iPhone,unaweza kuifuatilia vizuri simu yako iliyopotea na kuibiwa

Jinsi ya kupata Android phone
Kwa android ni tofauti kidogo na Apple.Google wameweka app yao kwenye Play store  na unaweza ku-download

1.Search Play Store "Android Device Manager"
2.Install the app, na sign in kwenye account yako ya Google
3.Kuwa makini kuondoka kwenye checkbox. Ukiondoka usiache box checked,mtu yeyote anaweza kupata kifaa chako na kuzuia uwezo wa ku-track simu yako.
Kama umepoteza simu yako unaweza kufuatilia simu yako kwa kutumia simu nyingine au tembelea Google Android website.

Kama unatumia simu tofauti na hizo hapo juu, unaweza kupata simu yako iliyopotea kwa kufuata maelekezo yafuatayo.

1. Kama unatumia windows phone tafuta maelekezo hapa.
2. Kama unatumia BlackBerry 10, tack simu yako ya kutumia BlackBerry Project.

Mbatia anena ya moyoni

MWENYEKITI Mwenza wa Umoja wa Katiba Tanzania (Ukawa) James Mbatia, amesema ili kuweza kuanzisha chama kimoja cha upinzani chenye nguvu, inahitajika viongozi wa upinzani kujenga msingi wa uaminifu miongoni mwao.

Pamoja na kwamba hakutaka kutamka wazi kuwa uaminifu huo kwa sasa haupo, Mwenyekiti huyo pia wa Chama cha NCCR-Mageuzi, amesisitiza kuwa bado lengo la kuanzisha chama hicho kimoja cha Ukawa lipo palepale na linaendelea kufanyiwa kazi.

Mbatia alikuwa akihojiwa katika kipindi kinachorushwa kila Jumapili na Televisheni ya Azam. Alisema katika kuanzisha chama hicho, suala la uaminifu miongoni mwa viongozi ni muhimu ili kufikia malengo halisi ya uanzishwaji wa chama hicho.

“Hata mwaka 1964 hayati Baba wa Taifa Julius Nyerere pamoja na Abeid Amaan Karume, waliaminiana kwanza na kwa kutumia utashi wao wakaunganisha nchi mbili za Tanganyika na Zanzibar na kuzaliwa Tanzania. Waliamiana,” alisisitiza.

Alipohojiwa kwamba, kwa sasa Ukawa hakuna uaminifu ndio maana bado uanzishwaji wa chama hicho unasuasua, mbunge huyo wa Vunjo, aligoma kueleza kwa uwazi zaidi kusisitiza kuwa uaminifu ni lazima katika suala nyeti kama hilo.

Alisema kwa sasa azma hiyo ya kuwa na chama kimoja imeanza kuonekana zaidi kwa vitendo kuliko maneno kwani kupitia umoja huo walisimamisha mgombea mmoja wa urais hali iliyowapatia mafanikio.

“Ni kweli kwenye umoja wetu kuna migongano ya hapa na pale lakini hiyo ni kawaida lazima tuwe na fikra tofauti, lakini tungefikiria kwenye chanya zaidi ila bado kuna haja ya kujengeana uaminifu kwanza,” alisema.

Aidha, alisema uanzishwaji wa Ukawa ni wazo la NCCR-Mageuzi kwa kuwa tangu chama hicho kilipoanzishwa mwaka 1991 kilikuwa na lengo la kuunganisha nguvu ya upinzani.

“Kwa maana hiyo Ukawa ni mtoto wa NCCR-Mageuzi ambayo ni mama wa upinzani. Kususia vikao vya Bunge Akizungumzia kitendo cha wabunge wa upinzani kuendelea kususia vikao vya Bunge pindi inapotokea kutoelewana ndani ya chombo hicho, Mbatia alisema hiyo ndio njia pekee ya kupatiwa haki wanayoidai badala ya kukaa kimya."

Hata hivyo, alipobanwa na kuhojiwa kwa nini wasitumie fursa waliyonayo na kubaki ndani ya Bunge na kuwasilisha maoni yao, alisema hiyo ni njia mojawapo ya kuonesha hasira waliyonayo juu ya mfumo uliopo unaoliendesha bunge hilo.

“Hakuna mtu aliyesomea kuwa mbunge au Rais, mabunge yote yaliyopita yaliyoongozwa na Samuel Sitta na Anne Makinda, yote yalikuwa na malalamiko, lakini Bunge hili la 11 malalamiko yamezidi. Ndio maana na sisi tunaamua kutoka ikiwa ni njia ya kuonesha hasira hasa pale tusiposikilizwa,” alisema.

Kuhusu hoja kwamba kwa sasa tangu Serikali ya Awamu ya Tano iingie madarakani, Ukawa imeanza kudhoofu, Mbatia alikanusha hoja hiyo na kusisitiza kuwa kwa sasa umoja huo ndio umeonesha mshikamano hasa kutokana na matukio ya bungeni.

Ukawa na nguvu za Chadema Pamoja na hayo, Mbatia alisema kitendo cha Ukawa kuinufaisha zaidi Chadema kwa kuwapatia wabunge wengi ni jambo lililotegemewa kwani hata mwaka 1995 NCCRMageuzi nayo iliposimamisha mgombea urais aliyekuwa na nguvu kipindi hicho, ilijipatia umaarufu na mafanikio ya kisiasa.

Maridhiano bungeni Aidha, mbunge huyo alipongeza jitihada za Spika wa Bunge, Job Ndugai za kurejesha maridhiano yaliyovunjika katika mkutano uliopita baina ya wabunge wa upinzani na chama tawala na kusisitiza kuwa hatua za spika huyo ni jambo zuri la kuungwa mkono.

Alisema kinachotakiwa ndani ya chombo hicho ni kuhakikisha taratibu zilizowekwa zikiwemo kanuni za Bunge zinafuatwa huku akiendelea kumtupia lawama Naibu Spika, Dk Tulia Ackson kuwa ndiye tatizo la mvurugano ndani ya chombo hicho.

“Hata hivyo, Tanzania hii ni yetu sote, keshokutwa tunakutana na viongozi wa dini zote kuzungumza suala la amani ya nchi yetu. Naamini juhudi hizi zikiendelea tutafikia mahala pazuri,” alisema.

Wassira Aiomba Serikali Izungumze na Chadema ili Kumaliza Malumbano

Aliyekuwa Waziri wa Kilimo na Chakula na Kada mkongwe wa Chama Cha Mapinduzi (CCM), Stephen Wassira ameomba wasaidizi wa Rais John Magufuli kumshauri kufanya mazungumzo na viongozi wa upinzani ili kuepusha madhara yanayoweza  kutokea kutokana na maandamano yanayopangwa kufanyika Septemba 1.

Wassira ameeleza kuwa washauri hao wanapaswa kufanya hivyo kwani bado nafasi hiyo ipo kuliko kuacha Rais aingie vitani na wananchi wake kwani madhara yatawapata Watanzania wote.

“Wazungumze ili wasimuingize Rais kupigana na watu wake kwa maana wote tutapoteza. Kwa nini uweke askari polisi wote hao, msimweke Rais kwenye vita na watu wake,” Wassira anakaririwa na Jambo Leo.

“Kinachohitajika ni wasaidizi wa Rais kumshauri ili kuhakikisha kuwa tofuati zilizopo baina yake na vyama vya upinzani haziendelei ili kuepusha madhara yanayoweza kuzuilika, itafutwe suluhu,” aliongeza.

Akizungumzia uamuzi wa Serikali kupiga marufuku kufanyika kwa mikutano na maandamano, alisema kuwa tatizo linaweza kuwa ni aliyekuwa Mgombea wa Urais kwa tiketi ya Chadema, Edward Lowassa.

Alisema kuwa hii inatokana na joto la uchaguzi lililokuwepo pamoja na nia ya Lowassa kuzunguka nchi nzima kuwashukuru wapiga kura, kungeweza kuzua tafrani kubwa kwani alipata kura nyingi na alikuwa akidai ameshinda kwa asilimia 62.

“Ukiwaruhusu kufanya mikutano na ukwaambia kuwa atakayekuja kutoa shukurani ni Lowassa, ambaye amekuwa akipinga kushindwa ni sawa na kurejesha hali ya uchaguzi kipindi hiki,” alisema.

Alitaka Serikali kutoa elimu ya wazi kwa umma kuhusu sababu zinazopelekea kukataza kufanyika kwa mikutano ili kuweka mambo sawa.

“Kama mimi hapa nimetaja sababu kwamba inawezakana kuwa ni Lowassa. Sasa na wao Serikali waseme tu tunapiga marufuku mikutano na maandamano… wataje [sababu]na kuzifafanua,” alieleza.

Hata hivyo, Wassira aliwataka Chadema kusitisha adhma yao na kuhakikisha wanafuata utaratibu ili kupata haki ya kufanya maandamano na mikutano ambayo alieleza kuwa kila Katiba ya nchi duniani imeiweka, lakini bila kufuata utaratibu haiwezi kuruhusiwa.